昨日，天氣唔係太好，多雲，間中有雨，但係我地幾個行山好友仍然決定闖一闖，沿一條未行過的小徑上山。

---

～～撮要～～

日期： ２００７年１月２０日星期六

人數：４人

地點： 飛鵝山

天氣： 多雲，有一兩陣雨，能見度較低。吹和緩北至東北風，離岸海域風勢間中清勁。

難度： 低Ｂ級／入門級／普通級／專業級／挑戰級

相簿： http://community.webshots.com/album/557121022GBPaUU

---

～～行程～～

1130：在彩虹地鐵站集合，跟住去左牛池灣村食左小小野。

1215：食完野就出發，沿清水灣道向上行。

1234：經過彩雲邨來到飛鵝山下的扎山道（下山段）出口。

1255：沿扎山道上，途中會見到個亭，亭旁會有一幅地圖，同埋有個寫住馬鞍山郊野公園的牌牌，哩度就係上飛鵝山的入口啦。

1318：開始時都仲係梯級，但行左唔係好耐，條路已經唔係路，差唔多係雜草叢生，好在我地仍然隱約見到條小路，可以慢慢行上去，但因天雨關係，條路真係好跣。


1400：去到山腰，就會見到舊好大好大o既大石，哩個時候，我地休息左一會，跟著就要沿左方的小路而上，因為右方的小路好似好難行、好危險。

1428：來到十字路口，左方去大老山，前面就落山去百花林，右方就係飛鵝山山頂。

1432：終於上到６０３米高o既飛鵝山山頂，好大霧，乜野都睇唔到，好大風，吹到唬唬咁聲。山上有個無線電發射站，團友嘈姐話感受到強大o既無線電威力，為左唔好令大家生癌，我地影完相就回頭下山去。

1440：回到十字路口，轉右落山去百花林。


1515：大約半小時左右，就會去到扎山道（上山段），轉右行一陣，左方就會有個石碑寫住百花林。

1530：如果大家有聽過，百花林其實係一塊風水墳地，埋葬了好多幾代前的先人，而其中一個最出名o既就係孫中山母親楊氏之墓地，哩度前方遠眺就係西貢海，果然風景優美。

1542：繼續下山，會見到一塊好舊的石碑，寫住「南陔徑」。然後向左，沿百花林路行。

1556：無幾耐，又見到分叉口，總之就照住指示木牌，向蠔涌方向行。吖，好鬼多蚊……

1616：係樹林入面行多十五分鐘，就來到蠔涌路。咁o岩遇到一對男女揸架私家車上來到哩個偏僻o既地方，個男落車主動同我地吹左一陣水，我地就繼續睇地圖，跟住佢地又揸車走左，一對怪人，無端端揸車上來咁偏僻o既地方想做乜？

1625：沿馬路行，聽到好多好淒厲o既狗叫聲，原來有間寵物康樂中心，不過點解狗叫到好似要俾人劏咁聲。不久，終於見到村落，見右方有條路，以為係捷徑，可惜睇錯地圖，哩個分析係錯誤的，仲係內有一堆惡犬。前無去路，當然回頭啦。

1639：繼續沿馬路行，見到右方有條小徑。今次冇錯啦，哩條先係捷徑，穿過菜田，向水口村方向出發。

1651：過橋，仍舊沿馬路行，會見到南邊圍路和帝湖居。

1700：到達終點，西貢公路。

---

嗱……，又完成左香港其中一個山峰，都唔係好難者。吖……，近來發覺好似多左ｄ人話想去行山（不論男女），可能大家都開始重視健康吧。